أحلى يوم

طبعا انا من الشهر اللي فات وانا مستنية النهاردة يجي بفارغ الصبر عشان اكتبلك تاني بعد ما كتبتلك عن بحيرة كومو وختمت السلسلة اللي كتبتها عن رحلة ال 30 حول أوروبا …

وطبعا لما جه النهاردة لاقيتني مشغولة في ميت حاجة وحاجة كأن الدنيا منشنة على اليوم ده عشان انشغل فيه .. وفعلا الساعة بقت 11 ونص بليل وانا لسة مكتبتش حاجة .. ولوهلة كدة قولت طب ما اكتب بكرة بس لاقيتك واحشني اووووووووووووووي ومكنش ينفع اخلف وعد أو معاد معاد حتة لو المعاد ده كان وهمي وفي خيالي بس عشان انبسط شوية …

بعيدا عن المقدمة الطويلة دي اللي مش لاقية على الكتابة عن احلى يوم شوفته معاك

12 أغسطس 2013

طبعا انت لو فاكر الصورة دي فأكيد فاكر اليوم ده .. بتمنى من كل قلبي انك تكون فاكر اليوم ده وفاكر تفاصيله زي ما انا فاكرة كل حاجة عنه …

طبعا لو فيه اي صدفة حلوة في الدنيا دي مش هتكون زي صدفة اننا نتواجد في مكان بعيد زي ده في نفس التوقيت بعد طول غياب وشوق كان ماليني نحيتك .. يوم زي ده مش هعرف اوصفه في كام كلمة ولا حتى في كام بوست لانه ببساطة أحلى وأجمل يوم انا عيشته معاك واحلى يوم عيشته في حياتي كلها ..

اليوم ده الوحيد اللي حسيت وصدفت انك بتحبني ..

اليوم ده الوحيد اللي حسيت فيه بالامان معاك .. أمان عمري ما حسيته في اي لحظة أو في أي كلمة تانية معاك ..

اليوم ده الوحيد اللي كلامك كله كان صدق ومكنش فيه اي حوارات منك ..

اليوم ده الاول والوحيد اللي قولتلي فيه ” انتي عيلتي ” ..

اليوم ده الوحيد اللي لعبنا فيه سوا ونسينا اي حاجة حوالينا ..

انا فاكرة أول لحظة عيني وقعت عليك وانت جاي من بعيد في المكان اللي اتفقنا اننا نتقابل به .. انا عملت نفسي مش واخدة بالي وماشوفتكش .. بس صدقني ده مش عوجان ولا تقل بنات بس انا فعلا كنت مكسوفة جدا ومتلغبطة وبهرب بعيني منك لاني مكنتش عايزة غير اترمي في حضنك واقولك انا بحبك أوي وانت اول حب في حياتي وبتمنى تكون اخر حب …

كمان فاكرة لما ياسمين صاحبتي كلمتني وانا رديت عليها واحنا واقفين سوا على شط البوسيت وانت اتضايقت .. طبعا من حقك تتضاشق لاني كنت قليلة الذوق جدا .. بس صدقني انا كنت بتصرف بأي هبل عشان اهرب من عينيك واهرب من حالة التوهان اللي كنت فيها لمجرد اني حاسة انك واقف جنبي  ..

وطبعا فاكرة السلسلة اللي رجلي خبطت في بعضها أول ما شوفتها وبقيت مش عارفة اعمل ايه .. كان نفسي اخليك تلبسهالي بنفسك زي ما بشوف في الافلام وكدة بس كنت ميتة من الكسوف ولاقيت نفسي باصة في الارض وبلبسها وانا قلبي مزقطط عايزة اتشعلق في رقبتك زي العيال الصغيرة واقولك شكرا لانك موجود في الدنيا دي وانك سبب فرحتي ..

13 أغسطس 2013

اليوم ده بقا انا منبسطش فيه ..رغم اننا اتصورنا واتكلمنا فيه كتير .. بس مش عارفة ليه فيه حاجز نفسي بيني وبين اليوم ده

أول ماشوفتني قولتلي بدون مقدمات .. انتي ليه حاطة باودر .. طبعا مش من الذوق ان ولد يقول كدة لبنت وطبعا كسفتني جدا لانك أخدت بالك اني حاطة حاجة في وشي أو ان شكلي مش عاجبك وخصوصا اني كنت حاطة سان بلوك أساسا 😀 😀

تاني موقف حصل ضايقني .. لما قابلنا في الطريق جوز أختك وكل واحد منكم عمل من بنها وأخد طريق غير التاني .. وقتها حسيت انك جايبني من الشارع أو من شقة مفروشة ومينفعش تعرفني على أهلك .. بس عديت الموقف وقتها وقولت اختلاف ثقافات ..

ثالث موقف لما قولتلك عايزة غزل البنات وطنشتني وقولتلي بعدين .. يمكن يكون موقف اهبل بس انا كنت هبلة أوي وحاطة احلام بسيطة أودامي وكان منها اننا ناكل فريسكا أو درة مشوي زي ما بشوف في الافلام والمسلسلات .. بس بما اني بحب غزل البنات اووووي حبيت اني اعمل كدة معاك .. بس لاقيتك انت مش متحمس وأجلت الموضوع وقولتلي واحنا راجعين نجيب .. انا من اليوم ده يا فادي مجبتش اي غزل بنات لاني لسة مستنية تجيبلي غزل بنات واحنا راجعين ..

رابع موقف .. مش لازم احكيه

أما خامس موقف ده بقا اللي قفلي اليوم .. وقت ما جتلك المكالمة اللي خطفتك مني .. انا عارفة طبعا ان الموضوع كان خارج ارادتك بس انا وقتها قدرت الموقف ومحبتش ابين اني زعلانة .. بس انا عمري ما حكيتلك عن مشاعري اللحظة دي وقت ما ركبتني تاكسي عشان امشي وانت تروح لمامتك واخوك .. وقتها انا بصيت ورايا و التاكسي بيتحرك وشوفتك مديني ظهرك وماشي من غير ما تبص عليا ووقتها بس عرفت ان الدنيا هتخطفك مني دايما واني مليش نصيب فيك ..

عارف يا ف*** .. في كل مرة كنت بتسيبني فيها كنت بفتكر اليوم ده واللحظة دي واقول لنفسي ان اللي حسيت به لحظتها حقيقي وبيتحقق كل شوية معاك .. وان ده الواقع اللي هيحصل هيحصل مهما حاولت واجتهدت عشان اغيره وافضل معاك ..

من ايام مطروح وانا عارفة اني مليش نصيب فيك بس بقاوح وبعافر 🙁

بمناسبة كل الذكريات الحلوة اللي عشتها معاك في مطروح بتمني تكون ايامك كلها سعادة .. وتكون دايما بصحة كويسة ..

تاني أحلى يوم معاك

يوم 10 أكتوبر 2013 كان تاني أحلى يوم عشته معاك .. يمكن انت بتسميها ليلة ضالة زي ما قولتللي قبل كدة .. بس انا شوفتها ليلة شوفت الصدق في عينيك وسمعته في كل كلمة قولتها .. اليوم ده جميل وانا عمري ما هنساه من حياتي وفاكرة كل نظرة عينيك وكل نفس اتنفسته وكل كلمة وعدتني بها وخليت بها بعد كدة ..

عشان كل الايام دي جميلة فانا مش هسافر باريس زي ما كنت مخططة .. انا كنسلت الفيزا اللي كنت قدمت عليها .. وزي ما سافرت مطروح وروحت البوسيت في شهر سبتمبر .. فهكلم الهيلتون واحجز معاد في عيد ميلادك وهقضي اسبوع كامل هناك بتمشى انا والكلب بتاعي كل يوم في شوارع الزمالك .. وهفطر يوم 11 في كوفي بين زي ما كنت بفطر معاك ..

هحتفل بعيد ميلادك السنة دي زي ما اختفلت به اول مرة وفي نفس المكان .. بس المرة دي من غيرك .. وبما ان عيد ميلادك مش في الويك اند فانا كدة ضامنة اني هروح كوفي بين الصبح من غير ما اشوفك .. وخلال الاسبوع اللي هقضيه في القاهرة مش هروح نحية التجمع ولا الداون تاون لاني قررت من زمان اني مش عايزة اسببلك اي ازعاج ..

أشوفك دايما على خير ..

وعيد ميلاد سعيد مقدما يا حبي 🙂