ازيك ؟
انا بمر دلوقتي بحالة صحية سيئة اول مرة تعدي عليا .. او زي ما انت عارف انا مش بتعب اساسا بس معرفش ايه اللي حصلي من شهر فات .. بدأ الموضوع بوجع في الجسم كله وقولت ده اكيد برد مع ان البرد مبيعرفش طريقه لجسمي .. وبعد ما انتهى وجع الجسم دخلت في كحة مستمرة بتفجر صدري من جوا وبحس بوجع كأن حد ماسك حجر خرسانة خشن وبيهبد في صدري من جوا وبيحك بعنف لحد ما بعيط من الالم .. في الاول كنت فاكراه برد برضو وقررت اروح للدكتور بس فجأة لاقيت دم في المنديل وانا بكح وصداع شديد ماسك راسي وبقا ملازمني طول اليوم لحد اللحظة اللي بكتبلك فيها النهاردة .. انا فعلا مكنتش قادرة اكتب حاجة او ابص في سكرين الابتوب بس كل ما الوقت يعني الاقي نفسي مش عايزة اليوم يخلص لحد ما اكتبلك زي ما قررت ان اعمل كل شهر .. موضوع الكحة مستمر واحيانا كتير برجع الاكل من بطني لما باكل .. حالة صحية غريبة اول مرة امر بها ورجعت فكرت اروح دكتور عشان يخفف الالم بس قررت مش هروح دكتور لاني مش عايزة اعرف انا عندي ايه .. اللي عندي هيروح لوحده براحة ..
مبقتش اتأثر بأي وجع من بعد الوجع اللي حسيت به يوم ما اتخليت عني ولا يوم ما شوفتك اخر مرة في ستاربكس .. انا فعلا مستغربة ان الوجع المعنوي ممكن يكون اشد الما من الوجع البدني ..
وقت ما قررت اني اكتبلك كل يوم ١٠ من كل شهر كان نفسي اكتبلك حاجة حلوة .. كان نفسي اقولك كل الكلام اللي ملحقتش اقولهولك واحنا سوا .. كات نفسي اعبرلك عن مشاعري نحيتك اللي لسة محبوسة جوايا وانت مشوفتهاش .. كان نفسي اقولك كلام كتير واسرار كتير .. انا بكتبلك كل يوم وبحكيلك كل يوم في خيالي اكتر من اي كتابة ممكن اكتبهالك هنا ..
بس النهاردة بدل ما اكتب حاجة حلوة لاقيت نفسي بكتب عن المرض .. كلام مش حلو مفيهوش حاجة مبهجة ولا سبب انه يتكتب .. بس هعوض النهاردة بموضوع جديد كنت مأجلاه عشان اكتبه في احلى يوم في حياتي .. كمان ٣ ايام هيجي معاد احلى يوم قضيته معاك وهكتبلك فيه مهما كنت تعبانةأو مصدعة وهكون في مود احسن من دلوقتي عشان ده يوم مهم ..
خلي بالك على نفسك لاني بحبك ❤️
مينفعش اقفل الكلام على كدة .. و لازم يكون فيه حاجة حلوة اكتبهالك حتى لو مش في سياق اللي كان نفسي اقولهولك كله .. احب اشاركك أخر صوة اتصورتها مع علي ابن عبودي .. دا نونو جديد في حياتنا .. علي بيفكرني بعمر بالظبط لانه ظهر في حياتي بعد ماسبتني زي ما عمر جه للدنيا بعد انت ما سبتني اول مرة …
