اللي اتكتب في الصفحة دي واتمسح أكتر  من اللي ممكن تكون بتقراه دلوقتي .. مش متأكدة انك هتيجي هنا وتقرا تاني بس انا هكمل كتابة لحد ما اصحى يوم من النوم واحس ان الصفحات دي كلها هتتقفل ومش عايزة اكتب تاني ..

 

الهدف اني اكتب هنا كان انك تقرأ كلامي يوما ما .. وكان في اعتقادي ان اليوم ده هكون ان شاء الله تحت الارض .. ولكن رغم انك وصلت للكلام بدري معرفش ازاي .. وفرحتي بكلامي معاك النهاردة نساني اني اصمم اعرف انت ازاي عرفت الطريق لهنا .. ب

 

حبيبي فادي ..

كلمة حبيبي أو بحبك أو وحشتني بقت صعب اني اعرف اقولها وانا بكلمك وسامعة صوتك .. بقت كلمة محبوسة جوا انفاسي و وجوا دموعي المحبوسة في عيوني  .. بس انا هنا الكلام مش بفلوس ولا حد يحاسبني عليه .. لاني بكتب لنفسي ولانسان بحبه ومش عايزه منه حاجة غير انه يكون بخير ..

 

من اول ما صحيت وانا عايزة اكتبلك بسبب الحلم اللي حلمته امبارح .. انا اول مرة أحلم بالبيت عندك واول مرة انت تكلمني في الحلم وكمان أول مرة تاخودني في حضنك من زمان اوي .. انا قلقت عليك وبقيت مش مرتاحة طول اليوم وحاسة  ان فيه حاجة طابقة على نفسي وفعلا أخدت العربية واخدت فريدو وروحت قعدت شوية اودام سيسل وبعد كدة أخدت فريدو للدكتور وعملتله شوبنج عشان اضيع اليوم ..

 

بس اللي بيحصل ده زي الافلام والمسلسلات اللي بتاكل دماغ الناس ..

معقولة انت تكون هنا بجد .. ويكون الفاصل بيني وبينك شارع وانا مش عارفة؟؟

معقولة أكون لسة بحبك بعد كل ده وازقطط مجرد ما اشوف اسمك على التليفون ؟؟

معقولة بجد تكون كلمتني صدفة ولا تكون شوفتني وانا واقفة اودام سيسل ؟

 

مكالمتك كانت هتخليني مكتبش النهاردة رغم اني كنت مقررة اكتب عشان اقتل الاحساس اللي كان مضايقني طول اليوم .. ولما عرفت انك عارف الطريق لهنا فكنت ناوية اقفله خالص .. ولكن ليه ؟ انامش هقدر اقفل طريق كنت بعالج نفسي به .. كتابتي في البلوج ده مش للنشر ولكن كانت طاقة بطلعها وانا عايشة ويمكن حد يشوفها بعد ما اموت .. فاكرة نفسي كليوباترا عايزة أعمل اسطورة من قصة حبي لك 😀 😀

 

المهم اني النهاردة اتاكدت اني مكنتش بحلم لما كلمتني من يومين .. ولا كنت بحلم لما شوفت اسمك على تليفوني النهاردة ..

المهم اني النهاردة اتاكدت اني مش لازم اكون في علاقة عشان احب انسان .. ينفع احبه عادي وانا مش عايزة منه لا ارتباط ولا جواز

المهم اني النهاردة انبسطت بعد ما كنت نسيت معنى الفرحة والانسباط من زمان .. الغريب اني من يومين كنت بسأل نفسي هو يعني ايه الفرحة بس النهاردة عرفتها ..

المهم اني النهاردة لاقيتك برضو بتحلل الامور بمنطقية وعقل وترتيب عشان تعدد وتبرر اسباب انفصالنا .. بس ماقولتليش اي سبب واحد يخلينا نكمل مع بعض ..

المهم النهاردة اني اتأكدت ان الحب ممكن ينتهي 🙂

 

وأخر القول .. من غير ما تقول انا بدعيلك وبتمنى لم كل حاجة حلوة لك لان اساسا انا سعادتي بتيجي لما بحس انك مبسوط وكويس ..

 

أشوفك قريبا 🙂