حبيبي فادي ..

انا حاسة اني بعدت عنك اوي ومن زمان مكتبتش أي حاجة لك .. عشان كدة مكنش ينفع اعدي النهاردة غير لما اكتبلك زي ما قررت ..

يوم 10 في الشهر بقا يوم بحتفل به كل شهر .. تاريخ عيد ميلادك بقا زي الخيال اللي ملازمني في اي مكان بروحه وفي أي حاجة عيني بتقع عليها .. انا معرفش ايه سبب الارتباط الشديد ده برقم 10 10 اللي بقا محور حياتي وبقا عامل مؤثر في اني أخد أي قرار .. وكان أخر قرار أخدته اني لازم اكتبلك حاجة جديدة كل يوم 10 من كل شهر .. ودي أول حاجة بكتبها .. عن فريدو!

كان في بالي أول بوست لك يكون عن موضوع تاني بيطاردني في منامي .. بس الظروف الحالية اللي بمر بها اجبرتني اني لازم أحكيلك عن ابني .. وكان نفسي أكتبلك عنه وانا في حالة نفسية أفضل من كدة بس للاسف معرفتش اكتب غير لما الدنيا ضاقت بيا تاني وملقتش حاجة غير حضنك البعيد ألجأله كل ما احتاج و أحن له ..

أحب اعرفك ب ابني الجميل اللي في الصورة.. اسمه فريدو .. طبعا اسمه الحقيقي لولو .. وهو في الحقيقة كان هدية لعمر ابن محمد أخوية .. بس عمر مقضاش معاه غير 3 ايام بس وبعد كدة سافر .. وانا سافرت أسوان ورجعت فريدو معايا اسكندرية ..

أول يوم اشوف فيه لولو كان يوم 8 ابريل 2018 .. وده كان سبب اني اتعلقت به لاني قابلته في يوم من أهم أيام حياتي .. واصبحت ذكري عيد فرحنا اللي متمتش هي ذكرى أول يوم ليا مع فريدو .. وطبعا انا بعد ما اتعلقت بالكلب محستش ان اسم لولو ده حلو عليه . .وطالما انه هيعيش معايا وهيشاركني حياتي وهعتني به فلازم يكون له اسم بحبه وبيفكرني بك لدرجة اني فكرت اسميه تين تين يعني 10 10 بس لاقيتني بدور على اسم بحرف ال ف زي ما كنت عايزة أسمي أولادنا واعمل امبراطورية ف 😀 😀

ومن يوم ما عمر سافر اصبح فريدو هو كل حاجة في حياتي .. وجزء لا يتجزأ من روتيني اليومي .. طبعا مكنش فيه أي معاناه في الموضوع ده لاني اعتزلت الحياة العملية من يوم ما سبتني ومبقاش ليا نفس ولا اي هدف في الدنيا .. فبالتالي وقتي كله كان عشانه هو بس ..من ساعة ما فريدو دخل حياتي بقا ليه هدف وحاجة بتخليني اصحى كل يوم من النوم عشان اعتني بها والعب معاها وافسحها واعمل لها الاكل بتاعها وانظف وأحمي .. بقيت حاسة ان فريدو ده ابني اللي كان زماني شايلاه على ايدي لو كنا اتجوزنا في معادنا ..

فريدو عوضني حاجات كتير اووي وصحى فيا حاجات كتير ماتت جوايا ..

فريدو بقا ينام جنبي .. وهو مش بينام غير وانا بلعبه في شعره ورجله .. أحيانا كتير بتمنى انك تكون مكانه بس بلاق فريدو أوفى منك واكتشف اني نايمة جنب الكائن الصح ..

فريدو بيقعد جنبي لما بعيط ويفضل يمسح راسه فيا لحد ما ننام سوا ..

فريدو خلاني انساك شوية وانسى أكتبك في الاوقات اللي كان نفسي اكتبلك فيا ..

فريدو خلاني ارجع اشتغل تاني لاني محتاجة فلوس عشان اعرف اهتم به .. وكان رزقه واسع جدا .. تخيل أول شهر شغل ليا كسبت 95 الف جنيه في الشهر

فريدو خلاني ارجع تاني اتفاعل مع اسرتي واهزر معاهم واخرج مع اصحابي ..

فريدو عمل حاجات حلوة كتير أوي جوايا محدش عرف يعملها من بعدك .. لا سفر ولا ادوية ولا دكاترة ولا اي حاجة..

تخيل بعد كل اللي فريدو عمله معايا ده .. هصحى من النوم بكرة مش هلاقيه معايا ومش ليا .. عمر راجع مصر وهيقضي 3 شهور الصيف هنا وأكيد هياخد فريدو معاه الساحل .. فكرة بعده عنه رجعتني لحالة اكتئاب كنت نسيتها من بعد أخر مرة حاولت اقتل نفسي فيها يوم 20 مارس اللي فات .. انا مش هقدر ابعد عن حاجة تانية بحبها وكفاية بعدك انت عليا  .. وفي نفس الوقت مقدرش ازعل عمر ابن اخوية واخد منه حاجة بتاعته من الاساس .. يمكن انا اللي علقت نفسي بحاجة مش بتاعتي ..

يمكن أكون بستبق الاحداث وفريدو هيفضل عندي وعمر هيلعب به بس .. لان المنطقي انهم سابوه وانا اخدته عشان اكون صاحبته المستقبلية مش عشان اكون الدادا بتاعته لحد ما ينزلو كل سنة أجازة .. انا طبعا ممكن اروح اقعد معاهم في الساحل بس ذكريات الساحل بتفكرني بيوم قراية فتحتنا ورغم ان اخوية اشترى فيلا جديدة في قرية سياحية بعيدة شوية عن الفيلا القديمة بس برضو المرور بمكان الفيلا القديم حتى لو من بعيد بيسببلي أزمة نفسية ..

بكتبك النهاردة عن أهم حاجة موجودة في حياتي .. وكان نفسي اشاركك صور كتير بس بكتب وانا نايمة ومفتحة عن واحدة لاني فيه واحدة بنت حلال النهاردة خبطتي في دماغي بركبتها وهي بتبعد عن فريدو .. الصداع هيقتل دماغي خلاص بس عادي عشان انا اتعودت على حادث جديد كل يوم 10 من كل شهر .. هشاركك صور كتير ليا مع فريدة المرة الجاية ..

انا بحبك .. وهكتب لك كل يوم 10 من كل شهر ..

امتى هيوصل كلامي أو امتى ممكن تقراه .. مش مهم .. المهم انك دايما هنا جنبي ومعايا  ..

بحبك! واتمنى تكون بخير دايما!

الى اللقاء …