الهوني مون في النوبة

حبيبي البعيد

ده أول بوست هكتبلك فيه هنا في السلسلة الجديدة اللي هبدأ كتابتها .. انا هبدأ هنا بالكلام عن النوبة لاني كل سنة يوم 8 ابريل هكتبلك عن النوبة .. عايزة أكتب عن حاجات كتير مش للسفر بس :

هكتبلك في كل وقت توحشني ونفسي في حضنك ونفسي افضفض معاك بأي كلام ملوش معنى

هكتبلك عن أهلي اللي انت معرفتش ولا لحقت تتعرف عليهم

هكتبلك عن كل مرة احلم بك فيها أو احلم بوالدك

هكتبلك عن ناس كتير قابلتهم السنة اللي فاتت

هكتبلك عن أكتر الشخصيات اللي انا بحبها

هسجل اشعار كأني بقولهالك

انا هنا هعيش كل حاجة واقول كل حاجة كان نفسي اعملها معاك أو أحكيهالك من غير ما حد يقولي ما تنسي بقا وربنا يعوضك باللي احسن منه .. انا هنا معوضة نفسي بكل حاجة محتاجها .. خلقت عالم لنفسي معاك ومبسوطة بالعالم ده سواء كتبت فيه كلام حلو أو كلام كله غضب ..

 

النوبة تشهد يا حب عمري

من سنة فاتت يوم 21 مارس استقبلت خبر النهاية من بابا .. وفاكرة كويس اني استقبلت الخبر بصدر رحب لان كان فيه شيئ دايما جوايا عنده قناعة انك هتسيبني تاني .. وبالفعل استمريت في حالة تجنب الصدمة دي لمدة 20 يوم لحد ما حسيت بالغضب والياس جوايا بعد 20 يوم وعملت حاجة كدة مجنونة كانت هتريحني من الدنيا وتتعب كل اللي بيحبوني .. ورغم اني خلال ال 20 يوم دول حاولت اتواصل معاك تاني واتجنب صدمتي فيك بس كنت من جوايا عارفة ان مفيش أمل ..

بس أعمل ايه ؟ انا عارفة نفسي مش بسهولة هيخرج حبك من قلبي وافقد الامل فيه

انا عملت انشطة كتير عشان اتجنب الصدمة ..

– قصيت شعري ..

– قفلت كل وسائل التواصل الاجتماعي ..

– لبست الهدوم اللي كنت جايباها عشان البسهالك

– اتعرفت على ناس جديدة ..

– اشتريت هدايا لكل اطفال العيلة

– اشتريت عربية جديدة وسميتها “فيدو”

– اعتزلت الشغل تماما لحد دلوقتي وقررت ادور على نفسي من اول وجديد

– سافرت كتيييييييييييير ..

 

ولكن النوبة هي السفرية الاولى و الصديق الاول اللي دخل حياتي من بعد رحيلك ..

أول زيارة للنوبة كانت يوم 7 ابريل 2017 .. يعني قبل فرحنا بيوم واحد .. دي السفرية اللي كانت متاحة ليا وقتها عشان ابعد وأعيش دور القوية اللي مستحملة الصدمة ومش فارق معاها و كاتمة الوجع جواها عشان الكل لازم يشوفها مبسوطة ومتحسش ان حد زعلان عليها .. وبالفعل النوبة كانت اختيار جميل وغبي في نفس الوقت لاني كنت عايزاك فيه معايا ..

 

المكان في قرية غرب سهيل ساحر وهادي وبسيط لدرجة اني بدل ما اهرب منك اتمنيت وجودك معايا وحسيت شوية بالندم اني استعجلت وروحت مكان من غيرك .. كنت بتمنى وقتها ان اي حاجة اعملها لاول مرة أعملها وانا معاك وعينك تشوف اللي بشوفه ونتكلم ونتناقش واحضنك وامسك ايدك والعب معاك واتنطط واجري من هنا لهناك وانا قلبي مليان فرحة ان حب عمري بيشاركني الحياة بكل اللي فيها ..

 

سافرت ليه ؟

من أول شهر مارس وانا كنت زي مجنونة وكنت بعد الايام  والساعات عشان اكون معاك وفي حضنك .. انا فاكرة اد ايه انا كنت بتابع حالة الطقس اليومية لاني كنت خايفة موت ان يوم فرحنا الجو يقلب حر زي يوم الخطوية أو يقلب مطر بما اننا لسة مخلصناش شتا أوي .. وبعد اللي حصل قررت اني مش عايزة اعيش اليوم ده في اسكندرية .. ولا عايزة احس ولا اعرف الجو هيكون حلو ولا وحش .. وبعد تجرية النوية اللي بعدتني عن اسكندرية خالص قررت اني اقضي الهوني مون بتاعنا السنوي في غرب سهيل ..

 

أخوية محمد بيبني مشروع جميل هناك .. وعشان كدة كان سهل عليا اني اروح السنة دي كمان لان اهل غرب سهيل دلوقتي يعرفوني وبيرحبو بيا وبيقدروا يوفرو لي أي حاجة انا محتاجها .. انا بحب الناس دول وعمرو صديقي اللي عايش وبيشتغل هناك قاللي ان الناس بيتكلمو عني حلو اوي وبيكونو مبسوطين بوجودي .. انا بجد بحس بالونس معاهم وبتلهي عن التفكير فيك وأو التفكير في يوم فرحنا .. ومبحسش بالوحدة تاني غير لما اروح أوضتي باليل والبس هدوم نوم كنت جايباه عشان البسها لك انت بس .. وانام بكل هدوء وانا حاضنة دبلتك بايدي ..

 

كل مرة اقول اليوم هيعدي وهيكون تمام .. بس فعلا مبيعديش يا فادي ..

والنوبة تشهد

 

غرب سهيل ابريل 2017

 

الزيارة الاولى كانت في بيت نوبي اسمه “أرتي كا” في قرية غرب سهيل جنوب أسوان .. زي ما كان يوم 8 ابريل حلو باقي الايام كانت حلوة أوي بالمكان وبالصحبة الحلوة

 

 

غرب سهيل ابريل 2018

انا زرت غرب سهيل 8 مرات لحد دلوقتي .. مرة السنة اللي فاتت .. ومرة بعد ما رجعت من اوروبا في مارس 2018 .. والمرة الاخيرة في ابريل 2018 .. وبصراحة غرب سهيل في 2018 مختلفة لاني في فبراير وابريل قعدت في البيت النوبي كاتو دوول الرائع .. مكان اكتر من ساحر .. وفي الزيارتين قابلت عمرو اللي عايش وبيشتغل في النوبة .. تقريبا هو الشخص الوحيد اللي مش نوبي اللي اعرفه هناك لانه دايما متواجد في الفندق اللي انا قاعدة فيه .. مقدرش اقول ان فيه بيني وبينه صداقة قوية لاني مبقتش اقرب من حد بسرعة ولا بأمن لحد .. بس للامانة بستمتع بالوقت اللي بنقضيه في تصوير النوبة وكان بيسيبني أسوق عربيته في أي مكان عايزة اروحه .. هو بيحب التصوير والسينما وبستمتع بمناقشاتي معاه عن التصوير وبصراحة بيصور حلو .. اشهد له ان كل صوري في النوبة حلوة من ايده ..

 

 

انا معتقدش اني بكتب حاجة مهمة أوي بس تقريبا حالتي النفسية اتحسنت بنسبة كبيرة من بعد ما بدأت اكتب لك عن سفرية أوروبا .. وبعد ما الكتابة عن السفرية خلصت لاقت نفسي عايزة أكمل كتابة لك .. عارف يا فادي الوقت اللي بقيت اقضيه عشان اجمع صور كويسة واكتب كلام مرتب بينسيني البعد اللي بنا .. كل كلمة بكتبها بحس انها بتوصلك حتى لو عمرك ما هتقراها في أي يوم ..

مشاعر غريبة متخبطة جوايا بين حبي لك والرغبة في البعد عنك ونسيان حب أذاني واذى كل اللي حوالايا .. بس مش هفكر كتير في حالة التخبط دي طول ما انا حاسة ان حالتي النفسية مستقرة وانا بعمل حاجة حاساها مش بتأذي حد تاني وبتجمعني بك حتى لو بتجمعني بك في خيالي بس ..

 

أنا بكتب لنفسي ..

انا بكتب وبنام!

 

وكل سنة يوم 8 ابريل هكتبلك بوست جديد من أرض النوبة – غرب سهيل

أشوفك في البوست الجاي 🙂 وهحكيلك عن أحلى حاجة حصلتلي يوم 8 ابريل 2018