قبل ما اتكلم عن سبب العنوان احب اشكر سنة 2019 لانها اول سنة تعدي من غير ما اشوف حد كنت بحبه وبدأت مبقاش بحبه.. يحدث لاول مرة من 6 سنين …
2013 .. اتقابلنا في 17 مايو .. و 12 اغسطس .. و 10 أكتوبر
2014 .. اتقابلنا في شهر 9 في الجريك كامبس
2015 .. رجعنا لبعض في 21 أكتوبر .. واتقابلنا في الهيلتون والنادي اليوناني وستاربكس والمنتزة .. و في 14 نوفمبر في فندق وينسور بالاس
2016 .. اتقابلنا كتيير .. سنة خطوبتنا
2017 .. اتقابلنا كتير لحد ما سابني يوم 21 مارس
2018 .. البداية في التجمع .. ويوم 10 أكتوبر تاني ..
2019 .. المفروض كنا نتقابل 17 يناير بس بخخخخخخخخخخخخ
.
أحب اتكلم عن شهر يناير وايه اللي بيمثله الشهر ده بالنسبة ليا ..
من سنتين زي اليومين دول نزلت اول حاجة اكتبها عن رحلي في أوروبا وعن الحب اللي كان موجود في حياتي
من سنتين فاتو زي اليومين دول قابلت الحب القديم صدفة وكان لقاء مؤلم
من سنة فاتت كان فيه خطة سفر لفرنسا مع نفس الحب القديم .. معاد السفر زي النهاردة يوم 17 يناير .. بس طبعا واحدة من الوعود اللي اتعود الأخر أنه يدوسها برجله
من سنة فاتت كنت بكتب وانا موجوعة نفسيا وباخد أدوية للاكتئاب
. .
السنة دي بكتب ولسة مكملة اللى كنت بكتبه من سنتين
السنة دي لا قابلت حب قديم ولا جديد .. ولا فيه اي صدف والحمد لله
السنة دي مفيش اي خطط سفر .. اصل مش معقولة هسافر بايد واحدة
السنة دي بكتب وانا فيش عندي مشاكل نفسية لدرجة ان الدكتور بتاعي قالي مش عايز اشوفك تاني لمدة 6 شهور .. ولكن التعب الجسدي لعب دوره وبكتب بايد واحد ..
.
اتاخرت كتير في الكتابة لاني فعلا مش عارفة اكتب اوي المرة دي لاني تعبانة جسمانيا جدا .. بعد ما قضيت احلى رأس سنة في القاهرة مع اكتر ناس بحبهم دلوقتي في الورشة .. وبعد ما قضيت اول يوم السنة في مكان مميز جدا في اسكندرية وقابلت حد مقرب جدا الى قلبي .. قولت البداية الحلوة دي اكيد هتكون سنة زي الفل .. والحمد لله انا مازلت شايفاها سنة حلوة وايام جميلة ..
.
المهم ان يوم 2 يناير قررت اني عايزة اخد اجازة سنة كاملة من كل الاجهزة الالكترونية وبالتالي من الشغل كمان .. وكنت بفكر جديا في القرار ده لاني عايزة اتفرغ اني اعمل حاجات مبهجة أكثر في الحياة غير الابتوب و الشغل والفلوس .. وبالفعل اخدت خطوة وفتحت وديعة بمبلغ كبير اوي عشان يكون عندي دخل ثابت خلال السنة دي بدل ما اخلص تحويشة السنتين اللي فاتو دول بعد ما حققت التارجت المليوني 🙂 ودي بس البداية
.
طب ايه اللي حصل بعد 2 يناير .. كل اللي انا عارفاه اني صحيت من النوم لاقيت ايدي اليمين مبتتحركش وألم شديد في ظهري مش قادرة اقوم من السرير .. قولت عادي اكمل نومي ولما اصحى هكون تمام .. بس طبعا معرفتش انام تاني من فريدو اللي كان عايز ينزل الشارع يقوم بمهامه اليومية اكيد .. تحاملت على نفسي وخلصنا المهمة و الروتين الصباحي .. ورجعت اوضتي وكل ده وانا بحرك ايد واحدة بس ..
.
اهلي كانو في الإمارات في الوقت ده عشان عيد ميلاد ابن اخوية .. وانا دماغي ناشفة بكره الادوية وبكره الدكاترة .. وفضلت في السرير من يوم 3 يناير ليوم 11 يناير اعتقادا مني اني هبقى تمام لو ارتحت شوية .. وكدة كدة بقيت بنفذ قرار الاجازة من الشغل بس غصب عني …
.
طبعا ده السبب الرئيسي اللي اخرني عن الكتابة طول الفترة دي لاني بكتب حرف حرف بايد واحدة .. ولما لاقيت البطء ده قافل دماغي بقيت بكتب كل يوم شوية شوية .. السنة اللي فاتت كانت كلها ادوية بس نفسية والسنة دي مليانة اشعة ودكاترة وعلاج طبيعي وموال .. انا مش زعلانة من اللي بيحصل ده ولا حاسة اني مريضة لأن حد قاللي زمان اني شبه الحصان الاسود ده .. مش مهم بايد واحد او بالاتنين المهم اني لسة مكملة جري ومش بقف رغم الوقعات النفسية والجسدية اللي بشوفها .
.
اتعرضت زمان لازمة نفسية كبيرة وجعتني ولسة وجعاني بس قومت تاني وجريت .. والنهاردة يمكن اكون بتعرض لأكبر أزمة صحية اشوفها في حياتي بس هقوم منها بكرة وهجري وهكمل في اجازتي اللي انا عايزاها ..
زمان ولحد فترة قريبة كنت لما بتعب شوية او احس ان فيه حاجة مش حلوة فيا.. كنت بمسك تليفوني واتمنى اكلم حد سابني زمان وقطع كل سبل الوصال .. كنت مش بفكر في حد غيره .. لكن المرة دي انا سعيدة لانه مجاش على بالي خالص وانا في سريري لمدة 10 ايام لوحدي ومريضة .. انا سعيدة ان معدل تفكيري فيه بقا قليل اوي واكيد قريبا هينعدم تماما ..
.
يمكن هو فاتني وراح .. بس سابلي حاجات صغيرة بمسك فيها .. حصاني الاسود ..
.
.