صباح الخير .. نفسي ابدأ كلامي المرة دي وانادي بكلمة حبيبي ولكني وعدت نفسي ان مش هقول الكلمة دي عليك تاني .. عايزة احافظ عليها إلى انسان تاني اقولهاله من غير جفاء ومن غير هجر وقسوة …

كان نفسي اكتب كل حاجة يوم 10 زي ما اتعودت .. بس حبيت أؤجل الكتابة للنهارة .. يوم 17 مايو .. اليوم اللي شفتك فيه أول مرة وشوفت ابتسامة لسه مرسومة في قلبي لحد دلوقتي .. اليوم اللي اتفتح فيه شباك جديد في حياتي .. ومن شباك لشباك لحد ما حياتي بقت كلها شبابيك بتفتح وتقفل كل يوم وانا ومش عارفة سبب لوقوفي فيها ..

ليه شبابيك؟

عمري ما حكيت ولا كتبت عن الشبابيك اللي كانت بيني وبينك .. واعتقد ان انت كمان متعرفش حاجة عنها ولا عمرك فكرت فيها او في وجودها في حياتنا ..

تفتكر كام شباك وقفنا فيه سوا ؟

تفتكر كم شباك فصل بيني وبينك ؟

وكام شباك وصل بيني وبينك ؟

لو حصرت وحكيت عنهم مش هخلص كلام ..  البدايات كلها كانت باطلالة حلوة لحد ما جه بصيت عليك من شباك تاكسي مطروح اللي فوقني من حلم الحب واخدنى بعيد عنك وقال لي خليكي فاكرة ان مهما عدت عليكم لحظات حلوة في الاخر ملكيش نصيب فيه وهتبعد بينكم الايام ..

شبابيك الماضي كتير .. بس لما بصيت لنفسي في الصورة دي لاقتني عايزة أطل على الدنيا من شباك النهاردة وشبابيك جديدة لبكره و بحاول اقفل شبابيك امبارح بكل اللي فيها من حلو ومن مر ..

عارفة اني لسة مش شايفة حد مكانك .. او يمكن لسة مش لاقية اللي يشوفني ويخليني ابعد عيني وقلبي عنك ويقف جنبي والاقي كتفي في كتفه ونطل سوا على دنيا جديدة من شباك فتحناه سوا ..

مش عيب افضل مكاني واقفة أطل على الدنيا من شباكي لوحدي لحد ما الحب يلاقي طريقه ليا .. ولما يعدي من قدامي هيلاقينى واقفة بعد ما شلت ايدي من على خدي وفردتها قدامي عشان اخده في حضني من غير كسوف او تردد ..

ولحد ما الوقت ده يجي .. عمري ما هقفل شباكي في وش حب حقيقي حتى لو بعد سنين كتير .. و خلينا واقفين ❤️

من 6 سنين

تخيل النهاردة عدى 6 سنين على احلى ابتسامة شوفتها في عينيك .. عايزة أكتب كل شوية واوصف في اليوم ده بكل تفاصيله وبكل كلمة اتقالت بنا .. عايزة أكتب عن النشاط والحيوية اللي كانت مالية كانت مالية حياتي في الوقت ده .. الحيوية دي مكانتش بسببك انت بس كانت بسبب ان قلبي كان لسة بكر فيرجين يعني وبيحب الدنيا وشايفها صافية ..

بقارن حالي دلوقتي بحالي من 6 سنين فاتو ..

– من 6 سنين كنت بحب الشغل وعندي طموح كبير .. النهاردة بكره الشغل وبشتغل ليل نهار عشان الفلوس وبس

– من 6 سنين بكتب عشان انت تقرأني .. النهاردة بكتب لنفسي ..

– من 6 سنين كنت بستنى عيد ميلادي وعيد ميلادك عشان اكون معاك .. النهاردة بهرب من الأيام دي بعيد بعيد ..

– من 6 سنين صحتي كانت عشرة على عشرة وكنت اهتم بها .. النهاردة من دكتور لدكتور وتحاليل وأشعة والتشخيص النهائي ان مفيش علاج للمرض ده في المراحل الاولى .. والعلاج بييجي لما الحالة تتأخر .. فبقيت عايشة متابعة حالتي المرضية لحد ما ربنا يفرجها من عنده وأكون في حالة متأخرة وادخل في مرحلة جديدة في حياتي وهي غرفة العمليات والعلاج .. وده بقى اهم شباك أنا بطل منه دلوقتي .. شباك مراقبة الصحة من جديد لحد ما نندفن في التراب بإذن الله ..

– من 6 سنين كنت مصدر طاقة ايجابية لنفسي وللناس اللي حواليا .. النهاردة مقدرش اعيش من غير دكتور و ادوية اكتئاب اللي مش عارفة اوقفها لحد دلوقتي ..

– من 6 سنين كنت عايزة اعيش وبحب الحياة عشان اقابل حب عمري وقابلته .. النهاردة كرهي للحياة بيزيد كل يوم وبتمنى الموت اكتر ما بتمنى اشوفك تاني .

– من 6 سنين كنت بحبك .. النهاردة لسة بحبك 🙁