حبيبي فيدو

من زمان مبدأتش حاجة بكتبها واقولك فيها حبيبي .. بس النهاردة انا حبيت اقول كدة عشان دي أخر مرة هقول فيها الكلمة دي .. عندي مشاعر النهاردة بين الحب والكرة والطاقة الايجابية والسلبية والقوة والضعف .. المشاعر دي مسيطرة عليا من أول الشهر وانا بعد الايام عشان أكتب النهاردة حاجة جديدة .. ووقت ما فتحت الصفحة وجيت أكتب راح كل الكلام اللي كنت عايزة اقوله

كان في بالي أكتب عن حبي الشديد لك وعن حياتي اللي بقت ماشية بس من جوايا واقفة مكانها بتبص بعيد على سراب ملوش وجود في خيالها وقلبها بس

كان في بالي أكتب عن اشتياقي الشديد لك وعن رغبتي اني أكلمك بس خوفي من الانتكاسة النفسية اللي وصلتني للموت قبل كدة منعني من أي محاولة للتواصل أو حتى اني اشوفك من بعيد

كان في بالي أكتبلك عن كرهي الشديد لك وكرهي للشيطان والوحش اللي عايش جواك .. الوحش اللي قتلني وأهنني وضيع أحلى سنين عمري في تعب نفسي وعاطفي ودخلني في دوامة مش عارفة اطلع منها

كان في بالي أكتبلك عن أحلامي اللي انت مبقتتش موجود فيها .. ومنامي اللي بقيت بشوف فيه حد غيرك لسة مقابلتهوش .. من أخر مرة اتقابلنا محلمتش بك تاني غير النهاردة وكان حلم وحش مسحته من ذاكرتي

كان في بالي أكتبلك عن حالتي الصحية في الايام اللي فاتت .. واللي بقيت حاسة ان التعب النفسي بيأثر على البدن لدرجة اني قلبت من انسانة كلها صحة ونشاط وحيوية لانسانة كل يوم عند دكتور ومواعيد الدوا بقت روتين اساسي في حياتها .. وحتى العلاج شيء غير مرغوب فيه لعدم الرغبة الاستشفاء

كان في بالي أكتبلك عن شركتي تين تين 🙂 وعن اللي وصلتله فيها .. واكلمك عن الشغل واقولك كل حاجة حلوة  بتحصل معايا .. انا من جوايا بحمد ربنا على النعم اللي بيديهالي بس انا من جوايا حاسة ان كل حاجة تحصيل حاصل

كان في بالي أكتب عن علاقتي بربنا الفترة الاخيرة دي واد ايه منظوري لحبي لك اتغير لما بقيت احب ربنا اكتر منك واكتر من اي حاجة في الدنيا .. لاقيت حبك فاني

و في الاخر لاقيت نفسي عايزة أكتر وأكتب واكتب كل حاجة وعكسها وحسيت قلبي عايز يتفتح ويرمي كل اللي جواه عندك .. معرفش ليه الحنين بيزيد رغم الالم والوجع والكره اللي بدأ يملا قلبي من نحيتك

وبعد تفكير عميق لاقيت نفسي هنا .. عند سيسل بدفن ذكريات قديمة في سنين قديمة عشان ابدأ سنة جديدة مع فوزية جديدة قلبها كله حب للماضي بكل اللي فيه وحب للحاضر بالواقع اللي بعيشه وحب للمستقبل واللي هشوفه فيه وكل اللي هقابلهم فيه .. يا خسارة جوايا لك حب نظيف غير مشروط وعايش جوايا رغم كل الشر اللي شوفته منك بس شرك لم يؤثر على طهارة اللي كنت حاسة به نحيتك واي حاجة حلوة جوايا بدأت حلوة وهتفضل حلوة .. أما انت فقد أخرجتك بلا رجعة ..

شكرا ف*** على كل ما الماضي فقد كنت خير درس لي في هذه الحياة .. أما الحاضر فلا يوجد فيه متسع من الوقت لك أو لشرك الذي كاد يقتلني .. ولا يوجد وقت لاطرح على نفسي أسئلة لا إجابة لها وإن وجدت اجابات فلا ارغب بمعرفتها فقد فات الاوان .. وأما المستقبل فأنت لست فيه بكل الذكريات والتشوهات اللي تركتها على جسدي وعلى قلبي

مش هكتب كتير في ختام ال 2018 عشان الكتابات اللي جاية كتير لكن هكتب بروحي انا الحرة من غير قيود حبي وحنين لك .. هكتب احساسي بس عشان عايزة اكتب مش عشان عايزة احس اني بكلمك .. روتين يوم 10 بقا جزء مني بعيدا عن اي ارتباط باي انسان اصبح من الماضي ..

المستقبل من غيرك أحلى