عدت سنة حلوة و بدأت سنة أحلى .. الحمد لله رب العالمين على كل النعم اللي شوفتها وبشوفها ولسة هشوفها في حياتي .. عارفة ان احيانا ايماني بيضعف وبتسحب نحية افكار هدامة شوية بس ده بيكون رد فعل على ازمة نفسة بتعرض لها في حياتي بس برجع تاني لنفسي وايماني يرجع جوايا وبيزيد أكتر ..

.

.

إيماني بربنا وبنفسي بيزيد كل يوم .. وبيزيد جوايا الاحساس بالرضا يوم بعد يوم .. كلمة الحمد لله هي صاحبتي اللي بقت ملازماني في حياتي .. تعبت السنة اللي فاتت كلها وماشوفتش فيها أي يوم حلو وكل يوم تعبي بيزيد لدرجة اني يأست من العلاج بس كل ما افتكر اي يوم من السنة دي الاقي نفسي راضية ومبسوطة بأي حاجة حصلت فيها وبقول الحمد لله ..

.

.

ضاعت سنة مش بعمل فيها اي حاجة غير اني نايمة في السرير وبتفرج على افلام ومسلسلات لحد ما دماغي كمان ورمت مش ظهري بس .. فلوس كتير ضاعت وشغل كتير راح وفرص شغل جديدة كمان راحت لدرجة اني بقالي سنة ونص حاليا عواطلية حرفيا ومش عارفة الاقي شغل جديد ولسة برضو حالتي الصحية متسمحليش ارجع للشغل تاني .. بس الحمد لله السنة عدت وعرفت اسرق منها سفرية سريعة لنويبع قدرت بعدها ارجع وانا رامية ماضي وحش ورا ظهري ..

.

.

اثار السنة القديمة لسة موجودة معايا بس الحمد لله على كل شيء .. حياتي ماشية حلو وكلها حب وسعادة واصحاب واهل ربنا رزقني بهم .. عندي امل في كل الايام اللي جاية .. رغبتي في الحياة والحب رجعت تاني ونسيت الماضي اللي حاول يشوهني وانتصر عليا لسنين طويلة بس الحاجة الحلوة اللي جوايا قدرت تنتصر في النهاية .. وفي قمة تعبي الجسماني قدرت اشفي تعبي النفسي ..

.

.

انا عارفة و مؤمنة ان ربنا بيحبني وعارفة انه هيديني على اد كل حاجة حلوة جوايا وكل حاجة نظيفة أهلي ربوني عليها .. انا غلطت كتير بس متأكدة ان ربنا هيسامح وهيغفرلي لانه عارف ان الحب كان عاميني ومسيطر عليا ..

.

.

مش مهم اي حاجة فاتت .. مش مهم اي أخطاء .. مش مهم حب راح او حبيب غدار او اي وجع شوفته في حياتي .. المهم ان لسة فيه النهاردة ولسة فيه بكره .. والحمد لله على كل شيء

.

.

انا النهاردة بكتب لنفسي وبقولها اني بحبك ..

.. و هكتب كل شهر تاني وانا بحب نفسي وبحب كل اللي حوالايا

.

.