مبسوطة الشهرده لاني رجعت تاني اكتب في معادي من غير تأخير رغم ان مفيش حاجة في دماغي أكتبها ولا فيه موضوع معين مسيطر على تفكيري .. الشغل بقا واخد كل وقتي وواخد كل تفكيري وأكيد مش جاية هنا النهاردة عشان اكتب عن الشغل ..

قعدت أفكر شمال ويمين .. شرق وغرب عشان الاقي حاجة مسيطرة عليا أحب احكيها .. بصراحة ملقتش غير اني اكتب عن ج ف .. اللي هو احلى حد قابلته السنة دي .. وكل يوم بكتشف انه احلى حد ممكن اي حد يقابله في الدنيا ..

كالعادة في شهر ابريل بسافر عشان عايزة اهرب من ذكريات وعشان عايزة أكون لوحدي من غير ما حد يشوف في عيني حنين لحلم اتقتل اوصاد عيني .. بسافر وبهرب من الناس عشان يقع في طريقي ناس وحاجات جديدة كلها حياة وفرحة وبترجعلي الروح من تاني ..

السنة اللي فاتت قابلت فريدو اللي غير حياتي وقلبهالي رأسا على عقب .. ولحد النهاردة من غيره مبكونش مبسوطة .. وبقيت بجري كل يوم بعد الشغل عشان ارجع البيت وننزل انا وهو نتفسح سوا .. الروتين اليومي معاه رغم انه مرهق ولكنه ينبض بالحياة ..

أما السنة سافرت برضو عشان اهرب .. ومن اول يوم ليا في اسوان قابلته هو ومجموعة كبيرة اوي .. ملفتش نظري في البداية بس اتعرفت عليه وعلى كل الجروب بنات واولاد واطفال ..و في أخر يوم لهم في الاجازة كان هو اقرب حد لاي وبنتكلم دايما .. وتقريبا من شهر ابريل لحد النهاردة واحنا بنتكلم يوميا ..

الطاقة الايجابية اللي بيديهالي ج ف كل يوم حلوة اوي .. احيانا بحس اني مرتحاله لان فيه شبه في الشكل من الراجل اللي كنت مرتبطة به في فترة من حياتي ولانه كمان نفس السن ونفس البرج .. بس الفكرة دي انا بطردها من دماغي لان مستحيل الانسان الرائع ده يكون شبه اللي ربنا يهديه اللي كنت اعرفه .. ده حرفيا ملاك ماشي على الارض .. انا عمري ما قابلت انسان جواه كل الخير ده ..

واحيانا تانية بحس اني مشدودة له بسبب النظافة والنقاء اللي حاسة بها جواه .. كان مسيطر عليا لدرجة اني قلعت السلسلة أول ما طلب مني ده من تاني مرة نتكلم سوا .. مش انا اللي كنت اتخلى عن السلسلة دي بسهولة بس فعلا لاقيتني عايزة اعمل ده وهو اداني دفعة وتشجيع قوي …