Happy Birthday to me

 

امتسردام .. المدينة رقم 21 في رحلتي .. ولكن رقم 3 في قلبي ..

حبي لامسترام مختلف عن حبي للمدن التانية اللي زرتها .. كل المدن اللي فاتت واللي جاية انا كنت محبوسة فيك ومش بفكر غير فيك ..

بس في امستردام لاول مرة انساك .. وافكر في نفسي بس ..

المدينة فيها طاقة ايجابية ملت قلبي وخلتني انساك لدرجة اني نسيت كمان اتصور معاك صورة حلوة 😀 😀

 

انا مش عارفة ليه قابلتك يوم ما كنت بكتب عن امستردام .. يمكن عشان لما اشوفك احس بالذنب اني نسيتك يومين من حياتي ؟

ولا عشان اكتب البوست ده باحساس مختلف كله غضب او كله حنين حسب نتيجة اللقاء الصدفة ده ؟

ولا عشان اوقف كتابة خالص ومعرفش اكمل اللي انا بدأته في رحلتي في البحث عن حياه وأحلام جديدة بعد ما اتخليت عني وقتلت حلمي بك وحياتي اللي كنت مستنياها معاك ؟

هو انا بجد انا قابلتك عشان ارجع اقف مكاني تاني وارجع لورا تاني ؟

بس انا مش عايزة اقف هنا .. وعايزة اكمل كتابة كل حاجة عملتها وبعملها وعشان اكون كويسة .. من غير اي ضغوط او تأثير منك .. الكتابة دي السلاح الوحيد اللي عرفت اقتل به حنيني واشتياقي لك .. وعرفت اقتل بها كرهي لك كمان ..

 

ايوة لما شوفتك نسيت الرحلة كلها ونسيت كل مكان زورته .. ونسيت الحالة الكويسة اللي كنت قربت اوصلها الفترة الاخيرة من حياتي .. وقضيت ايام محبوسة في سريري والدموع مش فارقاني .. والرغبة في اني اشوفك رجعت تاني وبقوة ..

وفي لحظة قررت اكتبلك تاني وابعت اترجاك نرجع لبعض ونحافظ على حبنا .. واول ما خلصت كتابة هديت وقلبي ارتاح ومبعتش حاجة وقلت رغبتي في اني اشوفك .. بعد ما كتبت رجعلي توازني تاني وافتكرت ان مفيش حاجة اسمها حبنا ولا حاجة .. ده حبي انا بس لان في العلاقة دي كان فيه طرف واحد بس هو اللي حب وعشق ومات من الحب ده والشخص ده هو انا ..

 

وقررت اكمل كتابة رحلتي والمشاعر المختلطة اللي شوفتها في كل بلد ومدينة زروتها  ..

رحلتي هي بداية العلاج الي مش عايزة اوقفه لحد ما اخف من لعنة حبك تماما والى الابد..

ونرجع تاني لامستردام ..

 

انا حلمت اكون معاك في مدن كتير بس امستردام لا .. امستردام فيها طاقة ايجابية تنعش الروح وتملا القلب قوة ..

وسعيدة جدا اني احتفلت بعيد ميلادي في المدينة دي ومع اصدقاء جدعين أوي .. وبكدة اكون نهيت اول 30  سنة من عمري في امستردام وبداية العمر الجديد بدأ فيها بردو ..

منكرش اني كنت مصابة باكتئاب شديد يوم عيدميلادي لانك مش موجود معايا ..

كان فيه خليط مشاعر مسيطر عليا اليوم ده نتيجة لذكريات كتيرة حلوة وذكريات وحشة .. ومبقتش عارفة افتكر الحلو ولا الوحش بس بقت كل المشاعر مسيطرة عليا ..

مش عارفة افتكر ان ده اليوم اللي انت عرضت عليا فيه الجواز واتصورنا اول صورة بتجمعنا سوا ..

ولا افتكر هدية عيد ميلادي البرفان المستعمل الخاص بوالدتك اللي جرحتني به واجبرتني اني اقبله من غير ما تحس في بانك اهنتني بالموقف السخيف ده .. صدقني وردة كانت كفاية واكرم من برفان طنط ..

ولا افتكر ان في كل عيد ميلاد كان بيعدي عليا معاك كنت بنام معيطة من الخوف انك هتسيبني تاني 🙁

ورغم ان مش كل ذكريات عيد ميلادي معاك كانت حلوة بس اتنميت ان كل اللي حوالايا دول مايكونوش موجودين وانت بس اللي تكون موجود .. بس مهما اتمنيت وحلمت مش هيتحقق الحلم .. ورغم ان بحلم الحلم ده بس بتمنى انه ميتحققش وتموت ذكرياتك الى الابد ..

دعيت كتير ان ربنا يحنن قلبك عليا واسمع صوتك او اشوف اي رسالة منك .. بس دعواتي ودموعي طارت في شوارع امستردام ..

انا بكره يوم عيدميلادي ده لاني رجعت افكر فيك بشكل مؤلم واتمنى وجودك ورجعت تاني احس بالوحدة رغم اني قابلت اسطول من الاصدقاء في امستردام ..

من أول اليوم ده وانا مبقتش عارفة اكمل صوري معاك ولا من غيرك ! 🙁 وفي الاخر بقيت اتصور صورتين واحدة معاك وواحدة من غيرك .. وبقيت احب صوري من غيرك اكتر من صوري معاك!

 

 

أيوة صح .. اتصور مع جوني ديب وهالك احسن 😛 😛

اتمنى اقضي جزء من حياتي بشتغل في البلد دي ..

اتعرف على ناس جديدة ..

اركب عجلة كل يوم وفي اي وقت واي مكان بدون الخوف اللي بحس به هنا في مصر ..

اعيش هنا بحرية من غير ما انت تتحكم في كل حاجة فيا وتمنعني من اني اتنفس الحياة ..

امستردام هي المدينة الوحيد اللي قالتلي “أحسن حاجة انك متجوزتيش الراجل ده ، ولو اتجوزتي في يوم من الايام متتجوزيش اللي يخنقك ويكتم على انفاسك ويدفنك تحت رجليه “

 

أما بالنسبة لاخر يوم في هولندا اللي اتجمع فيه الفريق القديم واصحابي كلهم وقضينا يوم في مدينة الطواحين زاندام .. الماء والخضرة والصحبة الحلوة كانت اخر يوم ليا في البلد الجميلة دي..

 

 

باي باي امسترادم .. وراجعالك تاني!