ايه رأيك في المكان الجميل ده يا حبي ؟

دي بورتوفينو .. قرية صغيرة جنب جنوا في ايطاليا .. قضيت فيها ساعات قليلة بس اتسحرت واتمنيت تيجي تشوف الجمال ده معايا ..

حتى لو مفيش نصيب نكون سوا في المكان الجميل ده .. انت لازم تروحه وتصفي ذهنك ..

مكان صغير جميل

عبارة عن البحر اللي اودامك ده والكام بيت الملونين دول وشوية مراكب ..

بس خلي بالك يا حبي .. كل حاجة هناك بتنتهي الساعة 5 .. يعني لوملحقتش تركب اتوبيس الساعة 5 فلازم تعمل حسابك انك هتقضي الليل كله في بورتوفينو الساحرة ..

 

 

مفيش كلام كتير اقوله عن بورتوفينو غير اني احب نقضي فيه الهوني مون بتاعنا 😀

ايوة عارفة ان كلامي عبيط واي حد عاقل لازم يضحك عليه .. بس بحلم وممكن الحلم يتحقق وممكن لا .. حتى لو الحلم عبيط او تافهه بس هو بالنسبة ليا احساس حلو جوايا عايشة به وسط العك والوجع والدموع اللي بشوفها كل يوم ..

انا بدأت رحلة ال 30 قبل ال 30 عشان اثبت لنفسي اني اقدر اعيش من غيرك وان فيه صورة ممكن تملى الفراغ اللي انت سايبه لحد ما هتخلى عن الصورة دي كمان واقدر اعيش تمام من غيرك ومن غيرك ذكراك .. بس بورتوفينو ببساطتها وجمالها البهجة اللي بتشع من كل شبر فيها احيت الامل والحلم تاني جوايا ..

 

بورتوفينو ملت قلبي بساطة .. واكدتلي ان البساطة ممكن تكون احلى حاجة في الدنيا ..

بورتوفينو الوانها فكرتني بنفسي زمان .. ايام ما كنت مبهجة وبضحك للدنيا ..

رغم اني وصلت بورتوفينو بصعوبة لان المواصلات لها مش دايركت زي المواصلات لاي مكان تاني روحته .. ورغم اني توهت ولفيت حوالين نفسي عشان اوصل انا ورفيق الرحلة كريم .. ووصلت في النهاية عشان الاقي المكان الساحر ده فاتح دراعه يحضني ويصحي الحب اللي جوايا ..

شكرا بورتوفينو لانك رجعتيني لنفسي وخلتيني الاقي الحب تاني بعد ما الكره ملا قلبي .. وكل ما الكره والغضب يسيطروا عليا تاني برجع اتفرج على صور مكان هادي وجميل زي بورتوفينو وفيينا ..

شكرا بورتوفينو! .. واتمنى ارجعلك تاني واقضي فيكي ايام او اسبوع مش مجرد ساعات قليلة ..

 

 

حبيبي ..

دور على مكان بسيط تزوره بعيد عن صخب العواصم المشهورة ..

دور على مكان زي بورتوفينو في ايطاليا او القرى الصغيرة في النمسا زي هالشتات او المدن الصغيرة في فرنسا زي ستراسبورج وكولمار والقرى المحيطة .. يمكن الحب يرجع قلبك تاني .. يمكن القسوة اللي عشت واتربيت عليها تموت ويملا الحب والرحمة مكانهم ..

هتلاقي الحب في مكان مكنتش تتوقع انك تلاقي فيه احساس زي ده ..

 

 

انا لاقيت الحب تاني في بورتوفينو .. ولاقيتك انت كمان هناك ..

لاقيت البساطة اللي انت نفسك فيها ..

لاقيت البهجة اللي كنت بتدور عليها جوايا ..

لاقيت الهدوء .. لاقيت البحر .. لاقيت الناس الطيبة ..

واهم حاجة لاقيتك جوايا لسة عايش ..

 

 

أيوة بحبك اوووووي .. هقولها ببساطة زي بساطة بورتوفينو ..

بحبك ومن غيرك فيه حاجة ناقصة في الصورة .. صح ؟

بحبك ومن غيرك الحياة كلها ناقصة مش الصورة بس ..

بحبك!

 

I found my love in Portofino, The original song 🙂

https://soundcloud.com/azizmannai/love-in-portofino-dalida