حبيبي البعيد ..

اليوم 8 ابريل لعام 2018 .. من مكان بعيد احتفل بذكرى يوم محفور في قلبي واكتب لك عن المانيا ..

كان نفسي اكتبلك في البلوج ده بسرعة واخلص مدينة ادخل في المدينة اللي بعدها عشان احس اني انجزت واقفل الصفحة دي من حياتي .. بس مبقتش اعرف اكتب غير لما أحب اتكلم معاك أو لما اسافر بعيد .. من اسبوعين فاتو مكنتش اتوقع اني اكون هنا دلوقتي وبكتب لك تاني .. بس مكتوب لي عمر تاني عشان اعيش يوم زي النهاردة تاني .. وعموما الاسبوعين اللي فاتو حكايتهم طويلة واطول من حكاية ألمانيا كمان .. خليني أركز دلوقتي واحكيلك عنها بدل ما كل شوية بكتب في الصفحة دي اي كلام و أمسحه تاني …

ليه ألمانيا؟

المانيا زي باريس زي روما زي اي مدينة انا اخترت ازورها عشان انت بتحبها وببقى عايزة عيني تشوف انت شايف الدنيا ازاي .. المانيا كبيرة ومبقتش عارفة اروح فيها فين ولا فين لانها عايزالها أجازة طويلة لوحدها بخطط لها عشان اعملها قريب بعد رحلتي الطويلة لجنوب شرق اسيا .. المهم اني في الاخر اخترت المدن اللي هزورها في ألمانيا على أساس وجود اصحابي ليا في كل مدينة.. و زرت 3 مدن مختلفة وقرية صغيرة قريبة من ميونخ

1. ميونخ
2. برلين
3. هامبورج

ميونخ كانت مركز الحركة

بعد ما خلصت الايام الجميلة في بارس لاغيت زيارتي ل سانت روبيه بسبب حالتي النفسية والانهيار اللي كنت فيه في باريس .. اذا كان باريس عملت فيا كل ده .. أومال لو زرت مكان اسمه بيفكرني بأحلى ذكرياتي معاك فقررت الغي سانت روبيه عشان أكيد أكيد هنروحها سوا يوما ما ومش ناوية اروحها لوحدي ابدا .. و بدل ما ازود تعبي واروح مكان يفكرني بك اكتر قررت اغير مساري واروح ميونخ عشان اقابل صديقي كريم هناك واسيب عنده شوية حاجات ملهاش لازمة معايا في السفر خصوصا ان تنقلاتي في ايطاليا هتكون كتير ومش هعرف اتحرك بشنطة هدوم شوية في الجو الصيف اللي كانت فيه ايطاليا في الوقت ده..

كانت نقلة قوية من باريس حيث الشيكة والاناقة والناس اللي بتبوس بعض في كل مكان لألمانيا حيث كل حاجة ماشية في نظام والاناقة مش شيء اساسي ومفيش بوس خالص : D

الوقت اللي قضيته في ميونخ كان ظريف لاني قابلت فيه اصدقائي هبة وكريم .. وكمان قابلت ناس مقبلتهاش من زمان اوي بالصدفة في الشارع .. ميونخ كانت بالنسبة ليا أوضة وصالة بمشي فيه في اي مكان بتكعبل في ناس اعرفها ..

ميونخ فعلا كانت مركز الحركة .. زورتها زيارة سريعة في اول الرحلة .. ورجعتلها تاني في اخر الرحلة عشان اقضي اخر 6 ايام عشان ازور منها سالزبرج وبعد القرى القرية منها وعشان أنهي واودع رحلتي معاك في أوروبا ..

مفيش كتير احكيه عن ميونخ أو ألمانيا عموما غير انها مكان قاسي يليق بك .. حكيت وكتبت قبل كدة عن ازاي البلد دي شبهك انت واي حاجة من طرفك ومش عايزة افتكر الكلام ده لاني بكتبلك النهاردة تاني في اليوم الجميل ده بمود مختلف تماما .. مود عايزة أحكيلك عنه بس مش دلوقتي .. انا هكتبلك تاني واكمل كل حكاياتي في بلوج تاني

برلين مع الناس الحلوين

برلين بقا من امتع الاوقات اللي عيشتها في المانيا لاني قابلت ناس حلوين كتير .. .. يا ترى فاكر كلاوس وجيزا اللي قابلتهم في برج ايفل يوم عيد ميلادك .. انا غيرت البلان بتاعتي وروحت على طول من براج لبرلين عشان الحق اقابلهم تاني في برلين قبل ما يسافروا امريكا .. انا حصلتلي حاجات كتير حلوة في رحلتي دي بس معرفتي ب كلاوس و جيزا أهم حدث لأن جيزا دايما تشجعني اني اكلمك تاني عندها ثقة ان انا وانت هنتقابل تاني وهتنرجع لبعض عشان كدة كنت بحب اقابلهم واتكلم معاهم ..

بيتهم في برلين كان عبارة عن حاجة جميلة وروح حلوة انت كنت هتحبها اوي .. كل جزء من البيت حدوتة لوحده .. على السلم الداخلي مثلا ممكن تلاقي تماثيل صغيرة من جميع بلاد العالم .. وعلى حيطة تانية ممكن تلاقي شخابيط ورسومات مودرن .. وبرافان صغير فاصل بين المدخل وغرفة الجلوس عليه صورهم القديمة مع اصحابهم .. وباب تلاقي عليه قطع مش شبابيك قديمة تحس بالنوستالجيا اللي انت بتحبها ..

هما حلوين اوي وبيتهم حلو كمان .. عايشين مع بعض 50 سنة رغم اختلاف شخصيتهم .. احترامهم للاختلاف بين ثقافتي وثقافتم كان موضوع مهم جدا في المناقشة بنا .. اتكلمنا في حاجات كتير وخرجنا بعد كدة وعزموني على العشان في مطعم سوشي جميل اوي وكان يم يم يم يم .. الاتنين كانو كوميدين اووووووي .. طول ما احنا مايشيين جيزا بتجري على اي محل هدوم زي الاطفال عشان تتفرج وتشد كلاوس عشان يتفرج معاها .. وهو راجل رزين ملوش في الشوبنج بس يضحك ويقولي .. My baby is crazy about shopping

انا قابلت اصحاب كتير في برلين وخرجنا كل يوم وزورنا اماكن كتير سوا وجربنا اكل ولعبنا كتير بس منبسطتش غير مع الاتنين الامريكان اللي عاشو حياتهم كلها مع بعض في أحد ارقى الاحياء في برلين ..

برلين أخر يوم

من أهم الحكايات هما الصورتين دول اللي بيأكدولي ان الدنيا صغيرة وانك ورايا ورايا مهما بعدت .. كنت واقفة في أمان بتصور أودام البوابة وإذ بصاحب كريم بيقرب من صورتك ويقولي انا اعرف اللي في الصورة ده .. انا اتخضيت لاني فعليا مش عايزة حد يتعرف عليك وعشان كدة بعمل فلتر على صورتك قبل ما انشرها هنا .. انا فعلا مش عايزة اسببلك اي مشاكل لان حكايتنا انتهت ومش ظريف بالنسبة لك ان حد يعرف ان فيه واحدة عايشة في مكان بعيد عنك وبتحلم بيك ليل نهار .. دراما كوين ها ها ها ها

بس الحمد لله الراجل مطلعش يعرفك معرفة شخصية وحكالي بس انه كانت شغال فترة outsourcing في اتصالات ومرة قعد على الكرسي بتاعك في الباص وانت جيت قومته منه .. طبعا مش عايزة اقولك انا دخلت في هيستيرية ضحك لاني عارفاك ومتخيلة الموقف ده كان عامل ازاي و احتمال انت نفسك تكون حكيتهولي قبل كدة في حكاياتك معايا عن وقت الباص ..

حقيقي انا انبسطت اني بسمع حاجة عنك .. وفجأة لاقيته بيسألني انتي عارفة كان بيعمل ايه كل يوم الصبح في الباص ؟ لاقيتني من غير تفكير بقوله بيقرأ أو السماعات في ودانه بيسمع مزيكا .. الراجل اندهش وقاللي ايوة صح انتي عرفتي ازاي .. عيني دمعت وقولتله اصله كان خطيبي بس بعد اذنك بلاش تيجيب سيرة الصورة اللي معايا دي لحد لان الموضوع انتهى خلاص .. الراجل اعتذرلي وقاللي انه فعلا ميعرفكش ومحدش هيعرف حاجة ..

عارف يا ف*** لما يجيلي فجأة حاجة من ريحة الحبايب .. ده اللي حسيته في اللحظة دي وكان نفسي اكمل كلام معاه يمكن يقولي اي حاجة يعرفها عنك أو يحكيلي عن اي موقف تاني لك في الباص .. كان نفسي اسمع اي حد بيتكلم عنك .. وفضلت دموعي ملازماني طول اليوم وانا بفتكر حكايته عن موقفه في الباص معاك كان فيلم قصير حابة اتفرج عليه كل شوية .. حتى وانا بتصور معرفتش اضحك من بعد ما حنيني زاد لك تاني!!

انت فعلا وحشتني!

وبالمناسبة دي اهديلك الاغنية دي اوووووي .. مش عارفة ايه العلاقة بينها وبين الموقف بس عجبتني كلمة “ليا عشم وياك يا جميل” .. عشان انت فعلا جميل 🙂

بس لسة الكلام معاك مخلصش .. ولنا حديث أخر في http://blog.fawziaessa.com/souly/