حبيبي البعيد والبغيض ..

اكتب لك عن بودابست الان وانا في طريق العودة الى الاسكندرية بعد انا فشلت ان اراك كما تمنيت .. لم اكن ارغب ان اضيف بودابيست في كتاباتي لك لانني لم اكن سعيدة في تلك المدينة ولم اشعر بالانبهار اللي الناس وصفتهولي عنها ..

انا حسيت بمشاعر مختلفة في كل مدينة زورتها بس بودابيست بذات كنت حزينة فيها .. حتى دلوقتي وانا بكتبك عنها بكتب وانا حزينة .. بكتب وانا راجعة اسكندرية بعد محاولة اني اشوفك من بعيد زي ما كنت بعمل زمان من ٣ سنين لما سبتني اول مرة .. التاريخ بيعيد نفسه قاصد يعذبني اكتر او يمكن قاصد يقولي انا هعيد نفسي لحد ما ترجعو لبعض تاني .. مبقتش عارفة التاريخ والزمن عايز مني ايه بعد ما أخد روحي مني وبقيت عايشة زي الشبح من غير روح ..

قولتلك قبل كدة ان باريس شبهك وحاسة ان روما شبهي .. بودابيست بقا حساها احنا الاتنين .. شبه علاقتنا المفصولة .. كانت اول مدينة اروحها يفصلها نهر الدانوب نصفين .. كنت لما بقف على ضفة من الضفاف بشوفك انت على الضفة التانية والدانوب لازم يفصلنا وكل ما امشي شوية الاقي كوبري يوصل بنا واعدي الكوبري ولما اوصل الاقيك انت بقيت على الضفة التانية .. طب اروح فين عشان اوصلك؟

ليه انا وانت مش واقفين على نفس الضفة ؟ ليه حياتنا مفصولة عن بعضها زي اي مكان مفصول بحاجز طبيعي مينفعش نعديه الا لما نبني جسور؟ .. حتى بلدنا اللي اتولدنا وعيشنا فيها مقسومة نصفين شبهنا وكأن مكتوب علينا نفضل مفصولين تحت مسمى كدة خير ..

طب هل الخير ده في النهر اللي بيفصل بنا ..

هل الخير ده دوره انه يروى عطش الناس كلها ويسيبني انا عطشانة ..

هل الخير ده هينعم علينا يوما ما ولا هيفضل فاصل بنا ؟

مش كفاية على الخير ده انه يعرف اني بحبك وبتمنى ان الخير يكون واصل مش فاصل ؟

حبيبي .. يا ترى انت شايف الدنيا ازاي من الضفة اللي انت واقف فيها؟

ورغم اني كنت شايفة الدانوب فاصل عنيف شبه الشرخ اللي موجود في حياتنا واللي معذبني بس احساسي التاني اني كنت شايفاه وسيلة وصل بس صعبة شوية .. كان ممكن النهر ده يكون صحرا منقدرش نعديها ولا نشوف لها اول من اخر .. بس الفاصل ده مياه لو اتعلمنا العوم هنعديها .. انا عارفة ان ممكن نستخدم الكوبري ونعدي ونقدر نوصل اللي فصله الدانوب ولكننا دوما نأخذ الطريق الصعب .. نختار دوما طريق العوم بدلا من تخطي الكوبري بخطوات بسيطة .. ونعوم شوية لحد ما نتعب ويرجع كل واحد للضفة الخاصة به تاني ..

طب ليه يا حبي ؟ ما الكوبري السهل البسيط الممتنع موجود!

وكعادتي في الحزن لم يأتي لي سوى ذلك الرجل الذي احب .. عم نبيل باباك ❤️

مينفعش تضيق بيا وملاقيهوش اودامي يطبطب عليا ويهون عليا ويديني الامل في ابنه .. اعتقد ان لولا ظهور والدك الفترة اللي فاتت دي انا كنت استسلمت من زمان ورضيت بقرارك القاسي ..بس ملقتش محدش فاهم مشاعري نحيتك غيره ومحدش وقف جنبي غيره! رجلا لم اقابله في الحقيقة ولكنه يعيش بداخلي يبحث معي عن روحي التائهة .. ولو كان موجود في الحقيقة بجد كانت الدنيا كلها اتغيرت .. رحمك الله!

كل ما اخد خطوة لورا هو اللي يشجعني اخد خطوة للامام ..

كل ما اقوله كفاية يقولي فيه امل ..

كل ما اقلق عليك يجيلي ويطمني ..

كل ما اتعب يقومني على رجلي تاني ..

كل ما ايأس يفضل مصاحبني ..

الدانوب في بودابيست كان حزن جوايا وكان خير شوفت فيه والدك يمد لي يده وهو مبتسم ويطمني تاني .. شكرا على وجوده ❤️

مفيش كلام كتير اقوله عن بودابيست ورحلتي فيها لاني كنت تايهة وسط مشاعري .. حتى الصور كلها مش جميلة .. بس بودابيست في المساء كانت جميلة ..