حبيبي البعيد ..

فيينا المدينة رقم 17 خلال رحلتي حول اوروبا ولكنها تصدرت المكانة الاولى في قلبي .. يمكن عشان انا اول يوم قابلتك كان يوم 17 واول يوم قولتلك بحبك برضو كان 17 ويمكن عشان سبتني قبل فرحنا ب 17 يوم وفضلت عايشة 17 يوم عندي امل ان ده كابووس وهينتهي والفرح هيتم في معاده ..

وعموما يا حبي مش لازم الاقي سبب منطقي بين الرقم وبين حبي للمدينة 😀

انا مش عارفة أقولك ايه عن فيينا وجمال فيينا ..

الجمال اللي يخطف القلب ..

الهدوء اللي يصفي الروح ..

النظافة والنظام والشياكة اللي تسحر العيون ..

المازيكا هنا في كل مكان .. وانت بتحب المزيكا اوي ..

فيينا تصدرت المكان الاول في قلبي ولا يوجد اي مدينة اخرى تنافسها في هذه المكانة ..

انا حلمت كتير اني اروح باريس معاك وعمر فيينا ما كانت من ضمن خططتي معاك .. بس مش عارفة ليه كل ذرة هواء أودامي في فيينا بتنادي عليك وبتتوسل  انك تكون جنبي دلوقتي في المكان ده.. انا لحد دلوقتي بسافر بصورتك بس ونفسي الصورة تكون حقيقة مش مجرد برواز خشب بتحرك به في كل مكان ..

حبيبي الغائب ..

 في الممر ده انا شوفتنا واحنا عواجيز وماشين جنب بعض هنا .. يمكن عشان معظم اللي كانو في المنطقة دي عواجيز اليوم ده ?

معرفش ليه عايزة اعيش جزء من حياتي في فيينا .. يمكن عشان ده أكتر مكان حسيت انك هتكون هادي فيه وهتبعد عن كل الضغوط اللي بتمر بها في حياتك ..

حسيت انك ممكن تتحول لشخص هادي في المدينة دي وصافي البال ..

يمكن لو عشت في جو مريح متسيبنيش تاني ..

يمكن لو بعدت عن كل الضغوط متبعدش عني تاني ..

يمكن لو عشت في مكان كله مزيكا زي ما انت بتحب وتصحى وتنام وتاكل وتشرب مازيكا تفضل مبسوط على طول .. يمكن!

أنا مش عارفة اشوفك دلوقتي رغم اني اقدر اوصلك بس عاهدت نفسي ان مفيش اجبار انسان على علاقة هو مش عايزها .. بس انا عايشة مع ذكريات وصورة  وحلم اني اشوفك تاني ماشي جنبي زي كل الناس اللي شايفاهم ماشين جنب بعض و ايديهم في ايد بعض في شوارع فيينا ..

معادنا بعد 10 او 20 سنة أو اي وقت يكون قدري اني اشوفك فيه .. ويمكن يكون معادنا الجاي في فيينا ..

بحبك!